As 'n mens uit 'n reisoogpunt oor Oktobermaand wil skryf, is die eerste ding wat in jou kop opkom C. Louis Leipoldt se gedig. Want hy vertel ons immers Oktobermaand is die mooiste, mooiste maand.

Wel, dit hang af hoe jy daarna kyk. En waar jy is en wat jy doen. Dis 'n mooi maand, want dit het opgehou reën in die Kaap (wel, dis veronderstel; partykeer sneeu dit nog op die pieke, maar dis ook mooi, net ontydig) en dit het begin reën in die noorde. Lentereën en bloeisels, groen gras ná die brande.

Tog dink ek Oktober is 'n anderster maand. G'n wonder nie. Die sterre maak tot 'n weegskaal in Oktober. Want die jaar is in die weegskaal. Dié maand is amper soos 'n lang sake-ete: te laat om terug kantoor toe, maar te vroeg om huis toe te gaan.

Voor jou sien jy die einde van die jaar in sig. Agter jou lê driekwart van die jaar op sy rug. Jy is lus vir ontspan. Vir kuier. Vir reis. Tog kan jy nêrens heen nie, jy moet nog klaarmaak.
Om te keer dat hierdie weegskaal nie skeef hang nie, het ons gesorg dat Oktobermaand die mooiste, mooiste leesmaand is. Sorg dat die reishonger jou nie van koers laat gaan nie deur saam met Riana Scheepers op bladsy 20 terug te reis na die bittersoet van KwaZulu-Natal toe dit nog Natal was.

Of jy kan saam met Mike Horn om die wêreld reis op bladsy 28, Venda-legendes gaan opspoor op bladsy 38 en daarna op bladsy 46 uitvind hoe om vir twee dosyn veldfietsers in die Richtersveld te sorg. Daarna kan jy via Bonnievale en Ermelo gou oorskiet na Bath in Engeland. Alles en nog meer in die mooiste, mooiste maand.

Ja, as jy nou terugsit op jou stoep, jou Mooiloop oopmaak en regskuif om op 'n lekker leesreis te gaan, vat net eers so diep asemteug deur jou neus. En jy sal dan besef Leipoldt is reg. Want:

orals in die tuin rond ruik jy sering en roos,
jasmyn en katjiepiering, lemoen en appelkoos.

Groetnis